Nin St. Paul degan ayaa lagu soo oogay afar dacwadood ka dib markii eeyo uu lahaa ay weerareen dhaawacna gaarsiiyeen gabar yar oo Soomaali ah oo ka soo degtay baska iskoolka 8dii Febraayo.
Fal-danbiyeedka lagu soo oogay Marco Antonio Mendoza Landaverde oo 37 jir ah ayaa sharaxaad ka bixinaysa eedeymaha, oo ay ku jiraan in uu xakamayn waayay ayda kana talaalo cudurka ayda ku dhaco ama raabiyada
Dacwad oogayaasha ayaa sheegay in booliiska St. Paul ay gurmad u tageen bolooga 600aad ee Van Buren Ave. wax yar ka hor 4:45 p.m. Saraakiisha gurmadka ayaa Sumaya Faarax Cali oo 7 jir ah ugu tagay iyada oo ay nabarro kaga yaalleen wejiga iyo dhegta. Waalidka dhibbanaha dhalay ayaa booliiska u sheegay in ay guriga ku sii socotay ka dib markii ay gabadha baska ka soo dagtay. Ayda ayaa gabadha weeray, dhulka ku legday, qaniinyana ku bilaabay. Aabaheed ayaa saraakiisha u sheegay in xayawaanku ay u eg yihiin kuwa dadka isaga deriska la ah ay leeyihiin.
Mid ka mid ah deriska ayaa siiyey baarayaasha muuqaal ilaalo ah oo laga soo qaaday kamarad ku xirneed albaabka gurigiisa oo duubtay dhacdada, mid kalena wuxuu sheegay in eeyaha ay leeyihiin dadka deggan 605 Blair Avenue, oo dhawaan loo aqoonsaday Landaverde.
Saraakiisha ayaa la wareegay shanta ey 9-kii Febraayo. Waxay sheegeen in Landaverde uu u sheegay inuu eeyaha siidaayay maalin ka hor mana uusan ogayn in albaabka furan yahay. Waxa uu awooday in uu bixiyo caddaynta tallaalka raabiyada laba ka mid ah shanta ay, mana haysan shati ama ogolaansho u oggolaanaysa in uu yeesho wax ka badan saddex ey markiiba.
Dhammaan shanta ey ayaa ugu dambeyntii loo aqoonsaday inay halis yihiin waxaana ka takhalusay St. Paul Animal Control.
