Booliiska Jaamacada Minnesota ayaa xidhay sagaal qof ka dib markii ay ka qayb galeen mudaaharaad lagu taageerayo Falastiiniyiinta loogana soo horjeedo dagaalka ka socda Gaza.
Muqaal iyo sawirro la soo dhigay baraha bulshada ayaa muujinayay arday teendhooyiin ka dhistay Northtrup Mall oo ku yaala xaramka jaamacada ee Twin Cities. Waxaa ay goobta imaadeen 4tii subaxnimo waxayna wateen boodhadh ay ku muujinayaan taageeradooda reer Falastiin.
Qoraal ay jaamacada soo saartay ayaa lagu sheegay in mudaaharaadayaasha loo sheegay in ay faarujiyaan goobta 7 subaxnimo hadii kale la xiri doono. Inta badan ardayda way kala tageen hase yeeshee sagaal ka mid ay ayaa ka dhaga adeegay. Bayaanka jaamacada ayaa lagu sheegay in ay “ taageerto oo ay ixtiraamto xoriyatul qawlka iyada oo loo marayo mudaharaad sharci ah”.
Waxaa xusid mudan in Jaamacadaha dalka Maraykanka ay ka socdaan mudaaharaadyo lagu taageerayo dadka reer Falastiin loogana soo horjeedo dagaalka waxaana ka mid ah Yale University, Colubia iyo qaar kale oo badan.
Masuuliyiinta jaamacada ayaa wajahaya cadaadis sidii ay ku dheeli tiri lahaayeen xuquuqda xoriyada hadalka ee ardayda iyo shaqaalaha iyo sidii ay u ilaalin lahaayeen xuquuqda ardayda kala isirka ah.
Xildhibaanad Ilhaan Cumar gabadheeda Isra Hirsi ayaa ka mid ahayd arday la xiray xili ay ka mudaaharayeen xaramka jaamacada ku taala New York.
Wazaarada waxbarashada Maraykanka ayaa ku sheegtay warbixin ay soo saartay inay sare u kaceen cabashooyinka Islaam nacaybka iyo Yuhuud nacaybka tan iyo weerarkii 7-dii Octobar ee Xamaas iyo duqayntii Israa,iil ee Gaza.
Qaar ka mid ah ardayda Jaamacada Minnesota ayaa qorshaynaya mudaaharaad kale galabnimadii Talaadada si ay u xoojiyaan taageerada Falasiin ogana hadlaan xariga ardayda loo gaystay.
Dhaqdhaqaayada isbadal doonka ah ee ka dhaca dalka Maraykanka ayaa inta badan ka bilowda jaamacadaha kuna fida dalka intiisa kale. Malaga yaabaa in dhadhaqaaqa ardayda jaamacadaha Maraykanka ay keenaan isbedel ku saabsan siyaasada arimmaha dibada Maraykanka ee Israa,iil. Waqtiga ayaa ka jawaabi doona su’aasha.
